Gervigreindin á eftir að hjálpa fyrirtækjum á við skrifstofuhótelkeðjuna Regus við að kynnast viðskiptavinum sínum betur og veita þeim betri þjónustu. Viðskiptavinur Regus á Íslandi mun geta farið inn á hvaða skrifstofuhótel þess hvar sem er í heiminum án nokkurs nema síma og tölvu og dyr opnast sjálfkrafa fyrir honum. Tómas Ragnarz, forstjóri Regus á Íslandi, er gestur Ólafs Arnarsonar í hlaðvarpi Markaðarins á Eyjunni.

Markaðurinn - Tómas Ragnarz - 5

Nú er talað mikið um gervigreind, hafa tæknibreytingar einhver áhrif á það sem þið eruð að gera?

„Já, t.d. á bæði Hafnartorgi og í Garðabæ og á Kirkjusandi,“ segir Tómas. „Við munum byrja á Kirkjusandi. Þar verðum við komin með gervigreind til að nema þá sem koma inn á centerana, við erum alltaf að leita leiða til að þekkja viðskiptavininn betur þannig að þegar hann kemur þá getum við opnað, við þekkjum hann. Dyrnar opnast sjálfkrafa fyrir hann vegna þess að kerfið þekkir hann. Þetta er líka öryggismál.

Þetta munum við innleiða á Kirkjusandi á næsta ári og síðan koll af kolli alls staðar annars staðar þannig að viðskiptavinurinn geti labbað inn á alla centera hvar sem er og þurfi ekki að hafa neitt í höndunum nema bara tölvuna sína.“

Tómas segir að gervigreindin muni hjálpa til. „Við erum alltaf að leita leiða til að hagræða. Við bjóðum sama verðið út samningstímann þó að við séum bundnir vísitöluhækkunum í okkar leigusamningum þannig að við þurfum að finna leiðir til að spara á móti og samnýta. Og það er einmitt það sem við erum að gera, við erum ekkert annað en Uber fyrirtæki í skrifstofum.

Við erum 100 prósent stafrænt fyrirtæki. Allir okkar samningar, þú gerir það í gegnum tölvuna eða símann. Allir okkar þjónustusamningar við okkar viðskiptavini eru rafrænir. Við leitum sífellt leiða til að hagræða en samt þannig að gæðin séu alveg í toppi og klárlega á gervigreind eftir að hjálpa okkur að veita betri þjónustu og auðvelda okkur að þekkja þarfir viðskiptavina okkar,“ segir Tómas.