Orðið á götunni er að KR-inga dreymi um að fá Óskar Hrafn Þorvaldsson, þjálfara Breiðabliks, til að taka við þjálfun liðsins. Stjórn félagsins ákvað að láta einn dáðasta son félagsins, Rúnar Kristinsson, fara og leitar að eftirmanni hans. Ákvörðunin um að henda Rúnari út úr Frostaskjólinu fer ekki vel í alla þá sem halda með KR.

Óskar Hrafn er KR-ingur en líklega er það skot út í bláinn hjá stjórn félagsins að reyna að fá einn besta þjálfara landsins til að taka við KR í dag, aðstaðan hjá félaginu er léleg og fjármálin eru ekki sterk. Miklu meiri líkur eru á því að Óskar taki við liði í atvinnumennsku – þar er umhverfi sem samrýmist metnaði hans.

Líklegri kostir fyrir KR eru Halldór Árnason, aðstoðarþjálfari Óskars hjá Breiðabliki. Þá gæti Sigurður Ragnar Eyjólfsson eða Brynjar Björn Gunnarsson komið inn í Frostaskjólið en báðir eru fyrrum leikmenn félagsins. Ólafur Kristjánsson er svo á lausu og hefur ítrekað sannað ágæti sitt sem þjálfari.

Eldri KR-ingar láta sig dreyma um gömlu góðu tímana, þegar KR var í fremstu röð, og hefur nafn Guðjóns Þórðarsonar verið nefnt til sögunnar.

KR er á krossgötum – félagið er að vonast eftir nýrri aðstöðu en Reykjavíkurborg hefur dregið þær framkvæmdir á langinn. Félagið vill aftur komast í fremstu röð en líklega er nokkuð í að það ætlunarverk þeirra takist.