Enn bólar ekkert á ársreikningi frá Lindarhvoli ehf., en skila átti reikningnum fyrir lok febrúar. Komið er næstum þrjá og hálfan mánuð fram yfir skilafrest.

Þetta vekur nokkra athygli vegna þess að Í Lindarhvoli er engin starfsemi og hefur ekki verið frá 2018. Einu reikningarnir sem þar fara í gegnum bókhaldið eru lögfræðireikningar, fyrst og fremst vegna vinnu Steinars Þórs Guðgeirssonar við málsvörn í hinu svonefnda Lindarhvolsmáli.

Ætla mætti því að ársreikningsgerð félagsins væri með einfaldasta móti. Enginn starfsmaður er í félaginu og einungis einn stjórnarmaður, Esther Finnbogadóttir starfsmaður fjármálaráðuneytisins.

Um nokkurt skeið hefur viðkvæðið þegar spurst er fyrir um ársreikninginn verið að hann komi á næstu dögum. Þetta rímar nokkuð við viðbrögð við öðrum beiðnum um upplýsingar vegna Lindarhvols. Mjög erfiðlega hefur gengið að fá upplýsingar og viðkvæðið hefur gjarnan verið að miklar annir séu í fjármálaráðuneytinu, auk þess sem orlof setji strik í reikninginn.

Svo virðist sem sök þessa slóðaskapar við skil ársreikningsins liggi bæði hjá fjármálaráðuneytinu og Ríkisendurskoðun, en skýrsla Ríkisendurskoðunar um starfsemi Lindarhvols hefur einmitt verið mikið til umfjöllunar að undanförnu, enda legið óafgreidd í þinginu í rúm þrjú ár.

Ástæða þess að ekki hefur tekist að afgreiða skýrsluna um Lindarhvol er sú að forseti þingsins situr á greinargerð Sigurðar Þórðarsonar, fyrrverandi setts ríkisendurskoðanda um starfsemi Lindarhvols, en vitað er að Sigurður gerir alvarlegar athugasemdir við ráðstöfun eigna félagsins á meðan öll starfsemi þess er sögð vera til fyrirmyndar í skýrslu Ríkisendurskoðunar sem Skúli Eggert Þórðarson, þáverandi ríkisendurskoðandi skrifaði. Framburður vitna fyrir dómi í Lindarhvolsmálinu í janúar gefur til kynna lýsing Sigurðar sé raunsönn.

Fjármálaráðuneytið og Ríkisendurskoðun hafa lagst eindregið gegn því að greinargerð Sigurðar Þórðarsonar verði gerð opinber og nú virðist það ráðuneytinu og Ríkisendurskoðun um megn að skila einföldum ársreikningi Lindarhvols til Fjársýslu ríkisins meira en þremur mánuðum eftir að skilafrestur rann út.

Vekur þetta spurningar um stjórnun og vinnubrögð á báðum stöðum. Nú fer að verða spennandi að sjá hvort ársreikningnum verður skilað áður en greinargerð Sigurðar Þórðarsonar, sem forseti Alþingis hefur setið á að beiðni fjármálaráðherra og ríkisendurskoðanda, kemur fram í dagsljósið.