Óskar Sveinn Friðriksson hefur verið ráðinn framkvæmdastjóri Smyril Line Cargo á Íslandi og tekur við starfinu af Lindu Gunnlaugsdóttir.

Óskar hefur verið framkvæmdastjóri KAPP ehf undanfarin þrjú ár þar sem hann hefur stýrt stækkandi fyrirtæki í gegnum krefjandi tíma.  Árin þar á undan stýrði Óskar fjölmörgum uppbyggingar verkefnum í flutningageiranum og hefur yfir tveggja áratuga reynslu á því sviði.

,,Ég hef á mínum ferli fengið tækifæri í ýmsum stjórnendastöðum víða um heim innan flutningageirans og síðastliðin þrjú ár stýrt því skemmtilega fyrirtæki KAPP ehf. Flutningabransinn er mjög spennandi á Íslandi og það sem Smyril Line hefur verið að gera hér á landi er einstakt.  Þegar mér gafst svo  tækifæri á að taka þátt í áframhaldandi vexti Smyril Line á Íslandi þá var ekki annað hægt en að segja já takk við því. Ég mun kveðja KAPP með söknuði en á sama tíma hlakka ég mikið til nýrra verkefna,” segir Óskar Sveinn Friðriksson en hann hefur störf 8. ágúst nk.

,,Við erum mjög ánægð að fá Óskar í öflugan hóp starfsmanna Smyril Line.  Hann hefur sýnt það á síðustu árum að hann er öflugur stjórnandi í alþjóðlegu umhverfi sem mun nýtast okkur vel í áframhaldandi vexti,” segir Jens Meinhard Rasmussen, stjórnarformaður Smyril Line Ísland ehf.