Þingflokkur Pírata auglýsir eftir starfsmanni til að starfa með þingmönnum og öðru starfsfólki flokksins. Í auglýsingu sem birtist á Alfreð segir að helstu verkefni snúist um þingmálagerð, aðstoð við þingmenn í þingstörfum og nefndarstörfum, greiningarvinnu og úrlausn lögfræðilegra álitaefna, auk annarra tilfallandi verkefna.

Krafist er fullnaðarnáms í lögfræði eða sambærilegrar menntunar.

„Um er að ræða starf á skrifstofu þingflokks Pírata þar sem reynir á öguð vinnubrögð, skipulagshæfileika, frumkvæði, ábyrgð og sjálfstæði. Okkur vantar öfluga liðsmanneskju sem er tilbúin að starfa þétt með þingflokknum á komandi kjörtímabili. Um fullt starf er að ræða, tímabundið fram að næstu Alþingiskosningum að loknu þriggja mánaða reynslutímabili. Laun og önnur kjör eru samkvæmt kjarasamningi Félags starfsmanna Alþingis. Vinnutími er breytilegur.  Æskilegt er að umsækjandi geti hafið störf sem fyrst. Rökstuðningur fyrir því að umsækjandi uppfylli hæfniskröfur skal fylgja umsókn. Öllum umsóknum verður svarað. Konur og kvár eru sérstaklega hvött til að sækja um,“ segir í auglýsingunni sem má finna hér.