„Ég get ekki skrifað undir yfirlýsingar um að það sé fullreynt að reka annað flugfélag frá Íslandi. Ég byggi það meðal annars á því að ég tel að önnur lággjaldaflugfélög sem hafa verið starfrækt hér á landi hafi í raun farið út af sporinu í sínum rekstri. Það er ekkert náttúrulögmál þar að baki heldur einungis sú staðreynd að það voru teknar rangar ákvarðanir,“ hefur Markaðurinn eftir Birgi.
Hann segist telja langt í að ferðamannastraumurinn hingað til lands nái sömu hæðum og fyrir nokkrum árum þegar Icelandair og WOW voru með 50 til 60 vélar í áætlunarflugi. Play hafi ekki í hyggju að vaxa hratt, stefnan sé að vera lítið og sveigjanlegt flugfélag sem ætli að skila hluthöfum arði með því að finna „matarholur“ til hliðar við stóru flugfélögin. „Við ætlum ekkert að sigra heiminn og vera með fleiri tugi véla í rekstri – heldur vera fókuseraðir, einblína á afkomuna og virðið sem við erum að búa til fyrir viðskiptavininn. Það voru þessir hlutir sem fóru áður úrskeiðis í þessum lággjaldaflugfélögum,“ segir hann í viðtalinu.
Play stefnir á að hefja starfsemi í sumar með þrjár Airbus A321 Neovélar en stefnt er að því að fjölga vélunum í 6 til 8 á næsta ári en þá er stefnt að því að hefja flug til Bandaríkjanna. Birgir segist telja að heppilegur fjöldi flugvéla fyrir flugfélag eins og Play sé um 15 vélar. „Ef okkur ætlar að takast að halda niðri kostnaði sem lággjaldafélagi þá verðum við að gæta að því að vera með framboð sem endurspeglar raunverulega eftirspurn. Ef hún er ekki fyrir hendi þá er miklu betra að leyfa vélunum bara að standa óhreyfðum,“ er haft eftir honum.
