„Málið er miklu stærra en Icelandair. Það snýst um samningsrétt fólks í landinu,“ segir Ragnar Þór Ingólfsson í viðtali við RÚV þar sem hann er spurður út í yfirlýsingu VR frá því á föstudag þar sem hvatt var til þess að stjórnarmenn frá VR í Lífeyrissjóði verslunarmanna greiddu atkvæði gegn þátttöku sjóðsins í væntanlegu hlutafjárútboði Icelandair.

Yfirlýsingin var viðbragð við þeirri ákvörðun Icelandair á föstudag að slíta viðræðum við Flugfreyjufélag Íslands og segja upp öllum flugfreyjum. Um helgina var síðan höggvið á þann hnút er Icelandair og FFÍ skrifuðu undir nýjan kjarasamning.

Yfirlýsing VR hefur verið gagnrýnd og sögð vera óeðlileg afskipti af stjórn lífeyrissjóðs sem eigi að starfa sjálfstætt og taka ákvarðanir sem þjóna hagsmunum sjóðsfélaga. Félagsmenn í VR eru á meðal þeirra sem hafa lýst yfir óánægju með yfirlýsinguna.

RÚV spyr Ragnar hvort túlka megi yfirlýsinguna sem aðför að störfum félagsmanna VR sem starfa hjá Icelandair, annarra en flugfreyja. Sagði Ragnar Þór að VR væri breitt félag og aldrei yrði hundrað prósent ánægja með aðgerðir félagsins.

Ragnar segist standa við yfirlýsinguna þrátt fyrir að nýr samningur Icelandair og FFÍ hafi verið undirritaður. Hann segist jafnframt vona að Icelandair lifi af:

„Það vill ekki nokkur maður að félagið fari í þrot. En það er ekki sama hvernig þetta er gert. Það skiptir máli hvernig fyrirtækinu er bjargað. Það má ekki kosta okkur samningsréttinn.“