Sigurður Hannesson, framkvæmdastjóri Samtaka iðnaðarins, segir verktaka hrædda við að leita réttar síns gagnvart innviðagjöldum Reykjavíkur, sem kunni að vera ólögmæt, vegna ótta við þær afleiðingar sem það kynni að hafa á framtíðarverkefni þeirra. Fréttablaðið greinir frá.
Innviðagjöldin voru í fréttum liðinnar viku, þar sem þau áttu að greiða kostnaðinn við hin alræmdu pálmatré í Vogabyggð.
Samkvæmt lögfræðiáliti Lex lögfræðistofu, sem gert var fyrir Samtök iðnaðarins, voru sterk rök fyrir því að innviðagjöldin væri ólögmæt.
Þá fullyrti Friðjón R. Friðjónsson, almannatengill, í Morgunútvarpi Rásar 2, að aðilar sem hann þekkti til, héldu því fram að verktakar myndu ekki fá deiluskipulag nema þeir greiddu umrædd gjöld og þá flaug einnig samlíking um mafíustarfssemi á borð við þá er sést í bandarískum bíómyndum, í þættinum.
Sigurður segist kannast við þessi orð Friðjóns:
„Okkar félagsmenn kannast við að borgin sé í yfirburðastöðu við þessa samningagerð. Við höfum heyrt dæmi um þetta og hérna er um að ræða býsna háar fjárhæðir í gjaldtökunni. Fjárhæðir sem kannski hlaupa á hundruðum milljóna fyrir hvert verkefni. Án þess að vera með heildaryfirsýn þá sýnist mér að tekjur Reykjavíkurborgar á síðustu árum hlaupi á milljörðum króna. Það er stærðargráðan.“
Sigurður segir marga hafa áhuga á því að kanna réttarstöðu sína gagnvart innviðagjöldunum, en veit ekki til þess að nokkur hafi þorað því ennþá.
„En veigra sér við því vegna þess að, aftur, sveitarfélagið er í yfirburðastöðu. Þannig að menn vilja kannski frekar hafa gott veður varðandi verkefni til framtíðar.“
Þá segir Sigurður að Samtök iðnaðarins séu að skoða málið og hafi áhuga á að fara lengra með það.
