Gæti verið að ekki sé þörf á að byggja miklu fleiri hótel í Reykjavík – að minnsta kosti ekki í bili. Fréttir herma að herbergjanýting á hótelum hafi minnkað. Annað er að svo virðist að ný hótel geti ekki krafist jafn hás verðs og gert var ráð fyrir í áætlunum – þar hefur myndast slaki og það þýðir að erfiðara er til dæmis að standa í skilum með lán.

Teikn eru líka á lofti um að eftirsóknin í Airbnb húsnæði fari minnkandi. Samsetning ferðamannastraumsins hingað er að breytast. Verðlagið hefur auðvitað áhrif en líka sú megináhersla íslensku flugfélaganna að flytja gríðarlegan fjölda fólks yfir hafið milli Ameríku og Evrópu, með viðkomu í Keflavík. Á sama tíma hafa þýsk flugfélög fækkað ferðum hingað.

En hótelin rísa enn. Það er verið að byggja Marriott lúxushótel við hlið Hörpu. Á landsímareitnum er að verða til hótel þar sem eru sameinaðar nokkrar byggingar. Og svo birtist í dag mynd af fyrirhugugaðri byggingu Íslandshótela í Lækjargötu. Jú, þetta er hótel á besta stað í bænum.

Fyrri útgáfan af þessu hóteli vakti miklar deilur, hér er komin ný útfærsla. Ég ætla að láta fegurðarhliðina liggja á milli hluta að þessu sinni, en það sem vekur ekki síst athygli er hvað byggingin er há. Það er engan veginn hægt að segja að hún sé í samræmi við byggðina í kring nema sé tekið mið af allra hæstu húsunum. Húsin næst eru miklu lægri.

Þetta er reyndar í anda þess sem gert var með Hafnartorgið. Tekinn hæsti punktur í byggðinni í kring og látið eins og það eigi að vera viðmiðið.