„Það er mikilvægt að minnast sögunnar og þeirra áfanga sem hafa náðst. En líka að vera meðvitaður um það að jafnvel þótt við stöndum flestum öðrum þjóðum framar á sviði jafnréttismála, þá er enn verk að vinna,“

sagði Bjarni Benediktsson forsætisráðherra í ávarpi í tilefni af kvenréttindadeginum í dag. Þorsteinn Víglundsson félags- og jafnréttismálaráðherra afhenti styrki úr Jafnréttissjóði Íslands í morgun, alls voru veittir 26 styrkir í ár, að því er kemur fram á vef RÚV. Bjarni segir það skaða fyrir samfélagið að konur njóti ekki jafnréttis hvað varðar völd, áhrif og laun, því sé mikilvægt að Alþingi hafi sett þennan sjóð á laggirnar:

Það er skaði að því fyrir samfélagið þegar konur njóta ekki jafnréttis hvað varðar völd, áhrif eða laun á Íslandi. Þess vegna er svo mikilvægt að þingið hafi tekið ákvörðun um að stofna til þessa sjóðs sem nú er að úthluta í annað sinn og mun úthluta á næstu árum til verkefna sem geta orðið að liði í þessari baráttu.

Benti hann einnig á mikilvægi góðra fyrirmynda:

„Þær frábæru íþróttakonur sem við eigum hafa á alþjóðavettvangi gert orðið dóttir að samheiti fyrir konur sem láta ekkert stöðva sig.“

Víða er haldið upp á kvenréttindadaginn í dag, klukkan hálf þrjú var lagður blómsveigur að leiði Bríetar Bjarnhéðinsdóttur í Hólakirkjugarði þar sem Líf Magneudóttir forseti borgarstjórnar flutti ávarp. Nú kl. 16 verður haldið upp á hálfrar aldar afmæli Hallveigarstaða í Túngötu þar sem Guðni Th. Jóhannesson forseti Íslands flytur afmæliskveðju. Á Akureyri verður svo gengið í fótspor kvenna á Brekkunni, hefst kvennasögugangan kl. 17 í Lystigarðinum.