Ástráður Haraldsson lögmaður segir Sigríði Á. Andersen dómsmálaráðherra hafa brotið lög með því að fara ekki eftir mati hæfnisnefndar við skipun 15 dómara við Landsrétt. Í opnu bréfi til Unnar Brár Konráðsdóttur forseta Alþingis vísar Ástráður til laga sem kveða á um að dómsmálaráðherra sé óheimilt að skipa í dómaraembætti þann sem dómnefnd telur ekki hæfastan.

Ástráður var ásamt þremur öðrum á lista yfir þá sem hæfnisnefndin mat hæfasta en nafn hans var svo ekki á lista dómsmálaráðherra. Segir Ástráður að lagalega séð sé ekki annað hægt en að hafna tillögum Sigríðar Andersen. Hvetur Ástráður því Alþingi til grípa í taumana, annað væri ekki í samræmi við kröfur réttarríkis.

Sigríður hafnar því alfarið að embættisfærsla sín sé ólögmæt, segir hún í samtali við Vísi að hún hafi gætt að öllum reglum:

Það kemur skýrt fram í lögum um dómstóla að ráðherra getur vikið frá mati hæfnisnefndarinnar en geri hann það þarf hann að bera það undir Alþingi og það hef ég einmitt gert.