Andri Snær Magnason rithöfundur og fyrrverandi forsetaframbjóðandi kemur Jóni Þór Ólafssyni þingmanni Pírata til varnar og segir að reiði fólks sem upplifi óréttlæti sé beint í rangan farveg. Líkt og greint var frá í morgun þá býr Jón Þór á stúdentagörðum en eiginkona hans er í námi við Háskóla Íslands. Hefur þetta ollið nokkru fjaðrafoki í dag þar sem Jón Þór, sem þingmaður og varaforseti Alþingis, er með rúma 1,3 milljón króna í mánaðarlaun. Andri Snær segir á Fésbók að stúdentagarðar séu hvorki niðurgreiddir af ríki eða borg líkt og félagslegar íbúðir, en kerfið sé eftirsótt og í raun til eftirbreytni, mætti byggja 5000 íbúðir fyrir alla strax á morgun:

Hér er glæpurinn að það er ,,lúxus“ að búa eins og námsmaður hálfu ári eftir að hann settist á þing og þá væntanlega ,,eðlilegra“ að búa í villu í Garðabæ eins og talsverður hluti ráðamanna,

segir Andri Snær og bætir við:

Það er í lagi að tala um vafasama búsetu á eyðibýlum en þingmaður sem flutti ekki strax og hann var kjörinn á þing er ekki eitt þeirra. Þarna er bara verið að beina reiði fólks sem upplifir óréttlæti í rangan farveg með því að klæmast á persónu og fjölskylduhögum og skapa vantraust á fólki sem hefur ekki unnið til þess.

Undir þetta tekur Sara Óskarsson þingmaður Pírata, segir hún að allir sem telji rétt að fólk missi réttindi vegna þess sem maki þeirra geri eigi að „grjóthalda kjafti“:

Það sem Andri segir og grjóthaldi þeir svo kjafti sem finnst rétt að fólk missi einstaklingsréttindi sín sökum þess hver maki þeirra er eða gerir. Alveg grjót.