Fylgi Framsóknar jókst upp í 13,4%, úr 9,3% frá því í kosningunum, og stuðningur við Samfylkinguna hækkaði mest allra flokka frá síðustu mælingu eða um 2,0% og mælist nú 11,3%. Þetta kemur fram í nýrri könnun MMR, sem fyrr mælist Sjálfstæðisflokkurinn með mest fylgi íslenskra flokka með 24,9%, fylgi Vinstri grænna mældist 20,6% og mældust Píratar 13,7%, sem er eilítil lækkun frá síðustu mælingum. Fylgi allra flokka er þó innan vikmarka frá síðustu könnun.

Stuðningur við ríkisstjórnina lækkaði á milli mælinga. Alls kváðust 30,9% styðja ríkisstjórnina nú samanborið við 31,4% í síðustu könnun. Fylgi Framsóknarflokks mældist nú 13,4% og mældist 12,4% í síðustu könnun. Fylgi Samfylkingarinnar mældist nú 11,3% og mældist 9,3% í síðustu könnun. Fylgi Viðreisnar mældist nú 5,2% og mældist 5,5% í síðustu könnun. Fylgi Flokks fólksins mældist nú 3,6% en mældist 3,2% í síðustu könnun. Fylgi Bjartrar framtíðar heldur áfram að dragast saman, mældist nú 2,9% og mældist 3,4% í síðustu könnun. Fylgi annarra flokka mældist 4,4% samanlagt, þar af styðja 1,3% Dögun. Fylgi Alþýðufylkingarinnar, Íslensku þjóðfylkingarinnar og Sósíalistaflokks Íslands mælist óverulegt. 80,4% gáfu upp afstöðu sína til flokka, 4,3% kváðust vera óákveðnir og 8,3% myndu skila auðu. 2% myndu ekki kjósa og 4,6% vildu ekki gefa upp afstöðu sína.

Könnunin var gerð dagana 6. til 14. júní 2017, alls voru spurðir 974 einstaklingar, 18 ára og eldri.