Meirihluti Samfylkingar, Bjartrar framtíðar, Vinstri grænna og Pírata í umhverfis- og skipulagsráði Reykjavíkurborgar samþykkti í dag að leggja til við ráðherra að sveitarfélög fái heimild til að leggja sérstakt gjald á notkun nagladekkja. Fulltrúar Sjálfstæðisflokksins og Framsóknar og flugvallarvina lögðust gegn samþykktinni.

Halldór Halldórsson, oddviti sjálfstæðismanna í borgarstjórn, segist hafa lagt til að heimild yrði ekki samþykkt nema að undangenginni íbúakosningu.

„Mikilvægt er að hafa í huga að borgarbúar sem nota nagladekk gera það vegna þess að þeirra öryggistilfinning segir þeim að þannig séu þeir öruggari í umferðinni. Auk þess búa margir í íbúðagötum þar sem mikill halli er og léleg þjónusta. Þessir íbúar hafa ekki fundið aðra leið en að nota nagla. Með gjaldtöku er verið að refsa þeim fyrir að búa á stöðum þar sem íbúagötur eru ekki almennilega færar marga daga í röð þar sem þær eru ekki mokaðar. Til að gera nagladekk óþörf þarf betri vetrarþjónustu en er í boði í dag,“ segir í bókun minnihlutans.

Þar segir ennfremur, að hluti röksemdarfærslu meirihlutans fyrir því að hefja gjaldtöku vegna nagladekkja snúi að svifryki. Besta leiðin til að vinna gegn svifryki sé að þrífa göturnar oftar en það hafi verið vanrækt.