Sóley Tómasdóttir fyrrverandi forseti borgarstjórnar segir að ef kona hefði misst stjórn á skapi sínu líkt og Jón Þór Ólafsson þingmaður Pírata gerði á þingfundi í dag myndi ferli hennar í stjórnmálum líklegast ljúka mjög snögglega.

Reiði Jóns Þórs og blótsyrði í pontu Alþingis hefur vakið mikla athygli og hefur verið fjallað um málið á flestum ef ekki öllum vefmiðlum. Í orðaskiptum Jóns Þórs við Birgi Ármannsson þingmann Sjálfstæðisflokksins um tillögur Sigríðar Á Andersen dómsmálaráðherra um skipan dómara við Landsrétt sagði Jón Þór að hann væri ósáttur með hvernig staðið hefði verið að málum í stjórnskipunar- og eftirlitsnefnd og kallaði hann eftir meiri tíma til að vinna úr tillögunni.

Í miðri ræðu Jóns Þórs heyrðist hlátur úr þingsal og missti hann stjórn á skapi sínu:

„Þingmaðurinn hlær. Þingmenn verða að átta sig á því að á þetta þing veljast almennir borgarar sem eru ekki allir lögmenn og við þurfum fokking tíma til þess að geta unnið þetta mál!“

Þingforseti sló í bjöllu og Jón Þór baðst afsökunar á orðum sínum.

Sóley segir á Fésbókarsíðu sinni að miðað við reynslu sína þá myndi pólitískur ferill konu ljúka snögglega ef hún hefði misst stjórn stjórn á skapi sínu líkt og Jón Þór:

Í ljósi reynslunnar er athyglisvert að velta fyrir sér afleiðingum þess ef einhver kona myndi einhvern tímann missa svona stjórn á sér í ræðustól. Líklegast myndi hennar pólitíska ferli ljúka mjög snögglega.