Ákvörðun Þorsteins Víglundssonar félags- og jafnréttismálaráðherra um að skipa Magnús Geir Þórðarson útvarpsstjóra sem formann Jafnréttisráðs mætir víða harðri gagnrýni.
Sjá frétt: Útvarpsstjóri skipaður formaður jafnréttisráðs
Segir Jakob Bjarnar Grétarson blaðamaður Vísis að þetta snúist ekki einungis um trúverðugleika RÚV í tengslum við jafnréttisráð heldur um allan opinberan rekstur:
Afsakið en ég fæ ekki orða bundist. Er þessu fólki alveg drullusama um fagleg sjónarmið? Fjölmiðlum er ætlað að veita hinu opinbera aðhald. Hvernig á RUV að fjalla um til dæmis þetta fyrirbæri með gagnrýnum og hlutlægum hætti þegar útvarpsstjóri er formaður þess?,
spyr Jakob Bjarnar á Fésbókarsíðu sinni og bætir hann við að það versta við þetta sé að þetta atriði virðist ekki hafa íhugað af ráðherra, hans fólki né útvarpsstjóra. Óðinn Jónsson dagskrárgerðarmaður og fyrrverandi fréttastjóri RÚV spyr að sama skapi hver á að veita Jafnréttisráði aðhald:
„Útvarpsstjóri Ríkisútvarpsins er skipaður án tilnefningar til að leiða ráðgefandi nefnd á pólitísku sviði ráðherrans sem skipaði hann. Ætli þetta hafi gerst áður? Jafnréttisráð veitir vonandi ráðherranum og fleirum aðhald. Hver á að veita Jafnréttisráði aðhald? Ríkisútvarpið?“
Guðfinna J. Guðmundsdóttir borgarfulltrúi Framsóknar og Flugvallarvina tekur í sama streng, segir hún á Fésbók:
Bíddu nú er ég alveg hætt að skilja, fjölmiðlar eiga að veita stjórnvöldum aðhald og er það gert með því að skipa útvarpsstjóra sem formann jafnréttisráðs. Hvað næst, verður formaður SFS skipaður fiskistofustjóri?
RÚV hlaut nýverið gullmerki jafnlaunaúttektar PriceWaterhouseCoopers með 3,1% kynbundinn launamun undir stjórn Magnúsar Geirs, en í Fréttablaðinu í dag er sett spurningamerki við þá úttekt. Vísað er til fyrirspurnar Kolbeins Óttarsonar Proppé þingmanns VG sem lagði fram fyrirspurn til Kristjáns Þórs Júlíussonar menntamálaráðherra um hve hátt hlutfall verktaka væri í vinnu hjá RÚV. Í dálknum Frá degi til dags í Fréttablaðinu í dag er vitnað í orð Lönu Kolbrúnar Eddudóttur fyrrverandi dagskrárgerðarmanns hjá RÚV sem sagði að Kolbeinn muni aldrei fá svör við fyrirpurninni:
„Leynilegir verktakar eru vopn Efstaleitis í baráttunni gegn jafnrétti og jafnræði.“
