Birgitta Jónsdóttir þingmaður Pírata segir að ef þingið fái ekki fullnægjandi rökstuðning og álit sérfræðinga varðandi ákvörðun Sigríðar Á. Andersen dómsmálaráðherra um að víkja frá áliti hæfnisnefndar um skipan dómara við Landrétt þá sé ekkert annað í stöðunni en að lýsa yfir vantrausti á ráðherra.
Í tillögu sinni vék Sigríður frá niðurstöðum hæfnisnefndarinnar og skipti úr fjórum dómurum, hefur einn þeirra, Ástráður Haraldsson sent opið bréf á forseta Alþingis þar sem tillaga ráðherra er sögð ólögmæt. Því hafnar ráðherra alfarið og segir að ráðherra hafi veitingarvaldið og sé heimilt að víkja frá niðurstöðum nefndarinnar.
Jón Þór Ólafsson þingmaður Pírata sagði sagði í bókun stjórnskipunar- og eftirlitsnefndar að farsælla væri að fresta skipuninni um einn mánuð til að gefa ráðherra rými til að gera grein fyrir afstöðu sinni þar sem sérfræðingar sem komu á fund nefndarinnar hafi sagt að ákvörðun ráðherra myndi grafa undan trausti á dómskerfið.
Birgitta segir á Fésbók að ef þingið fái ekki fullnægjandi rökstuðning þá sé ekkert annað að gera en að leggja fram vantraust á Sigríði Á. Andersen dómsmálaráðherra fyrir þinglok í dag:
Það er alveg ljóst að ef við fáum ekki fullnægjandi rökstuðning og álit sérfræðinga að það sé fullnægjandi, að það sé ekkert annað að gera en að leggja fram vantraust á ráðherrann áður en þingið er úti. Meirihlutinn vill ekki verða við ósk minnihlutans um að það sé gætt að fagmennsku í þessu máli, það að varpa vantrausti á nýtt dómsstig er með öllu ólíðandi og að svo knappur meirihluti ætli sér að keyra þetta áfram, út af geðþótta dómsmálaráðherra er óþolandi og ólíðandi.
