Nicole Leigh Mosty þingmaður Bjartrar framtíðar brast í grát í ræðu sinni á eldhúsdegi Alþingis í gærkvöldi. Byrjaði hún ræðu sína á því að segja að henni þætti það merkilegt að vera annar innflytjandinn af fyrstu kynslóð til að flytja ræðu á  eldhúsdegi á eftir Pawel Bartoszek þingmanni Viðreisnar sem flutti ræðu sama kvöld. Sagði Nicole að mörgum þætti það eflaust ekki merkilegt og brast hún í grát þegar hún sagðist vilja segja hvers vegna sér þætti það merkilegt:

Það hefur ekki alltaf verið auðvelt fyrir mig að vera innflytjandi á Alþingi og líklega hefur það ekki farið framhjá neinum. Ég er ekki með allt á hreinu og stundum mismæli ég mig. Ég er fulltrúi fyrir flokk sem situr í ríkisstjórn á tímum þegar það er einfaldlega ekki vinsæll kostur að vera við völd. Ég hef hugsað með sjálfri mér hvort það væri ekki bara einfaldara að vera í stjórnarandstöðu því ég er eins og ég er… ég er öðruvísi,

sagði Nicole. Sagðist hún viss um að hugmyndir sínar um frjálslyndi hefðu ekki jafn mikil áhrif ef hún væri í stjórnarandstöðu en það væri auðveldara að geta tjáð skoðanir sínar án þess að þurfa að axla ábyrgð. Rifjaði Nicole upp þegar hún kom til Íslands fyrir 16 árum:

Þá starfaði ég eins og flestir innflytjendur sem ræstitæknir því það var ekkert annað í boði fyrir manneskju eins og mig. Ég mætti fordómum oft og víða en mjög margt hefur breyst.

Sagði Nicole að ekki sé boðið upp á sömu tækifæri í Bandaríkjunum og veltir hún því fyrir sér hvort við áttum okkur á hvað við búum við mögnuð tækifæri:

Við sem flytjum hingað þurfum að meta það hvort það sé þess virði að flytja hingað frá fjölskyldu og nánustu vinum til að setjast hér að. Fyrir mig hefur þessi samanburður sýnt mér að ég tók rétta ákvörðun því mér líður ákaflega vel hér. Ísland er svo sannarlega land tækifæranna.