Björn Bjarnason fyrrverandi ráðherra og þingmaður Sjálfstæðisflokksins segir að óskhyggju hjá stuðningsmönnum stjórnarandstöðunnar að telja að þingi ljúki með sigri stjórnarandstöðunnar og forsíðufyrirsögn Fréttablaðsins í dag „Sigur stjórnarandstöðunnar“, sé öfugmæli.

Segir Björn á vefsíðu sinni að fyrirsögnin minni á söluslagorð fyrir vöru sem þurfi að fegra með öfugmælum:

Í umræðunum í gær kom fram að ríkisstjórnin hafi lagt fram um 100 mál fyrir þingið frá því að hún var mynduð. Að sjálfsögðu var borin von að svo mörg mál yrðu afgreidd á þeim skamma tíma sem stjórnin og meirihluti hennar hafði til stefnu. Það er rétt mat að fresta þingi á áætluðum degi hvað sem líður afgreiðslu ótímabundinna ágreiningsmála,

segir Björn. Á sama tíma og ríkisstjórnarflokkunum er að takast að stilla saman strengi sé stjórnarandstaðan að splundrast vegna innri ágreinings:

Þessi niðurstaða fyrir þingfrestun verður Snærós Sindradóttur, blaðamanni Fréttablaðsins, tilefni forsíðufréttar undir fjögurra dálka stórfyrirsögninni í dag: Sigur stjórnarandstöðunnar. Fyrirsögnin minnir á söluslagorð fyrir vöru sem þarf að fegra með öfugmæli.

Fyrirsögnin vísar til þess að ekki verða settar á langar umræður um ágreiningsmál á þinginu – þau bíða einfaldlega afgreiðslu. Að telja þinghaldið sigur fyrir stjórnarandstöðuna er óskhyggja stuðningsmanna hennar.