Laun forstjóra Umhverfisstofnunar og orkumálastjóra hafa verið leiðrétt sautján mánuði aftur í tímann, eða frá 1. janúar 2016, samkvæmt nýlegum úrskurði kjararáðs.

Greint er frá þessu á vef RÚV.

Eftir breytinguna verða laun orkumálastjóra, Guðna A. Jóhannessonar, rúmar 1,3 milljónir á mánuði með yfirvinnu og forstjóra Umhverfisstofnunar, Kristínar Lindu Árnadóttur, 1,4 milljónir króna með yfirvinnu frá sama tíma. Ekki kemur fram í úrskurði kjararáðs hver launin voru fyrir breytinguna.

Kjararáð taldi að tilefni væri til að breyta launum þeirra, þannig hefði starfsemi Orkustofnunar aukist og verkefnum Umhverfisstofnunar fjölgað. Sagði Guðni í bréfi til kjararáðs að breyttar aðstæður kölluðu á verulega leiðréttingu á starfskjörum, stofnunin væri ekki lengur ráðgefandi heldur tæki sjálfstætt ábyrgð á viðamiklum og krefjandi stjórnsýsluverkefnum, því fylgi starfinu mikil ábyrgð.

Auk þessa úrskurðaði kjararáð að laun forstjóra Landsnets, Guðmundar Inga Ásmundssonar, yrðu 1,6 milljónir króna á mánuði með yfirvinnu frá 1. maí á síðasta ári.