Stofnfundur Sósíalistaflokks Íslands mun ekki bjarfga málunum og vinstri væng íslenskra stjórnmála, þess í stað þurfa vinstrimenn á Íslandi að endurskoða hugmyndafræðina í stað þess að líta til baka. Þetta kemur fram í Staksteinum Morgunblaðsins í dag þar sem fjallað er um stofnfund Sósíalistaflokksins í Tjarnarbíó í gær.

Ekki liggur fyrir hversu margir mættu á stofnfundinn, en miðað við myndband sem birt var á Fésbókarsíðu flokksins voru það allnokkrir.

Í Staksteinum Morgunblaðsins í dag segir:

Fyrir nokkru stofnaði Gunnar Smári Egilsson Sósíalistaflokk Íslands og hefur það fengið marga til að brosa út í annað. Í gær var svo haldinn stofnfundur þessa þegar stofnaða flokks, sem er eftir öðru og mjög viðeigandi. Á þessum „stofnfundi“ lagði flokkseigandinn línurnar og var það ekki síður viðeigandi,

segir í Staksteinum, segir einnig að ef marka megi skrif og umræður starfsmanna flokkseigandans á Fréttatímanum, launamanna sem ekki hafa fengið laun sín greidd, er ekki við stuðningi að búast úr þeirri áttinni við Gunnar Smára, „nýjasta og óvæntasta talsmann launþega og flokk hans.“

Og vinstri vængur stjórnmálanna tekur framtakinu ekki heldur fagnandi, sem ekki var von. Þessi margklofni vængur sem átt hefur undir högg að sækja hér á landi og víðar þurfti ekki á nýjum klofningi að halda.

Gefur ritari Staksteina svo vinstrimönnum á Íslandi heilræði:

Hann [vinstri vængurinn] þurfti miklu frekar á betri jarðtengingu að halda, betra sambandi við hinn almenna mann. Íslenskir vinstri menn hafa talað sig út í horn með sérvisku og fordómum.  En „stofnfundur“ einkaflokks mun ekki hjálpa við að bjarga málum á vinstri væng íslenskra stjórnmála. Björgunaraðgerðirnar krefjast hugmyndafræðilegrar endurskoðunar, ekki afturhvarfs til ranghugmynda í því skyni að bjarga einkahagsmunum eigandans.