Sigurjón M. Egilsson fjölmiðlamaður segir að Jón Þór Ólafsson þingmaður Pírata hljóti nú að taka þátt í baráttu fyrir bættum kjörum öryrkja í ljósi þess að hann býr í niðurgreiddri íbúð á stúdentagörðum þó hann sé með rúma 1,3 milljón króna í mánaðarlaun.

Sjá frétt: Þingmaður Pírata býr á stúdentagörðum

Sigurjón segir í pistli á vefsíðu sinni Miðjan undir yfirskriftinni Vaknaðu nú, Jón Þór Pírati að í gær hafi hann setið við hliðina á Guðmundi Inga Kristinssyni, baráttumanni fyrir bættum kjörum öryrkja í Silfrinu í gær. Þar nefndi Guðmundur fjölmörg atriði sem skekkja afkomu öryrkja og meðal annars skerðingar vegna launa maka.

Jón Þór sagði í samtali við Fréttablaðið í dag að það sé hluti af öryggi eiginkonu hans að hafa stúdentaíbúð og það sé ekki hægt að spyrða það við maka hennar, segir Sigurjón í pistli á vefsíðu sinni að margir taki undir það sjónarmið:

Viss er ég um að mörg okkar taka undir að réttmætt sé að konan þín hafi réttindi, jafnvel þó hún sé gift hátekjumanninum þér,

segir Sigurjón. Sagði Jón Þór jafnframt að þetta sé réttur eiginkonu hans og í raun sé partur af stærri umræðu um hvort réttindi fólks eigi að skerðast eða tengjast vegna maka, það sé hans skoðun að fólk verði að geta verið sjálfstætt þó það eigi maka. Sigurjón segir þetta merg málsins:

Þarna er mergur málsins. Nú hlýtur þú Jón Þór að taka þátt í baráttu Guðmundar Inga og annarra og gera þitt til að laga það sem þau berjast fyrir.

Það er nefnilega hárrétt að fólk verður að geta verið sjálfstætt þótt það eigi maka. Sameinumst öll um það. Líka öryrkjar og eldri borgarar.

Sigurjón segir að það megi alveg spyrja hvort það sé réttmætt að þingmaður með fín laun búi í niðurgreiddri íbúð í skjóli maka:

Trúlega er það svo Jón Þór, að allt um kring er fólk sem er í verri, og jafnvel margfalt verri stöðu, en þú og þín kona.