„Ég er mótfallin sértækum aðgerðum,“ sagði Þorgerður Katrín Gunnarsdóttir, sjávarútvegs- og landbúnaðarráðherra, í Morgunvaktinni á Rás eitt í morgun. Hún segist ekki ætla að grípa inn í kjaradeilu sjómanna og útgerðarmanna með lagasetningu eða breytingum á skattalöggjöf. „Þau sveitarfélög sem hafa byggt upp ábyrgt fiskeldi eru að koma betur út úr þessu sjómannaverkfalli heldur en önnur,“ segir Þorgerður og kveðst reiðubúin að koma að málinu til dæmis með því að styðja byggðir sem standa illa vegna verkfallsins.

Hún segir útgerðina með einkarétt á auðlind þjóðarinnar og því fylgi gríðarleg ábyrgð. Segist hún meðal annars vilja bjóða upp kvótann. „Ég tel að útgerðin þurfi einfaldlega að greiða meira fyrir auðlindina. Mín skoðun er eindregið sú að við eigum að leita leiða í gegnum uppboðið,“ segir Þorgerður Katrín.

Markaðurinn ræður þá því sem að útgerðin á að borga og ef að það gengur illa þá borgar hún minna og ef að það gengur betur þá tekur hún meiri þátt í að byggja upp innviði samfélagsins.

Vilhjálmur Birgisson, formaður Verkalýðsfélags Akraness, segir ljóst að ekkert verði af nýjum kjarasamningi vegna ummæla Þorgerðar Katrínar. „Nú hefur sjávarútvegsráðherra talað enn og aftur skýrt um að íslenskir sjómenn fái ekki að sitja við sama borð og annað launafólk í þessu landi og með þessum ummælum deyr það tilboð drottni sínum sem lagt var fram í gær til Samtaka fyrirtækja í sjávarútvegi,“ segir hann í færslu á Facebook.

Málið er að sjómenn eru alls ekki að biðja um neina ölmusu heldur einungis það að fá að sitja vi sama borð og allt launafólk í þessu landi sem þarf starfs síns vegna að starfa víðsfjarri sínu heimili. Búið spil.is!

Hér fyrir neðan má sjá færslu Vilhjálms í heild sinni: