Dánarorsök leikarans heimsþekkta Gene Hackman og eiginkonu hans Betsy Arakawa hefur verið opinberuð en heimsathygli vakti þegar þau fundust bæði látin á heimili sínu í Santa Fe í Nýju-Mexíkó, fyrir nokkrum dögum.
Daily Mail greinir frá því að yfirvöld í ríkinu hafi greint frá þeirri niðurstöðu rannsóknar á dauða hjónanna að Hackman hafi látist úr hjartasjúkdómi en kona hans úr sjaldgæfum sjúkdómi sem borist getur í menn úr nagdýrum.
Arakawa, sem var 65 ára, lést vegna lungnaheilkennis af völdum hantaveirunnar sem getur borist í mannfólk úr nagdýrum eins og t.d. músum, en sjúkdómurinn er sagður sjaldgæfur.
Hackman var 95 ára og lést af völdum háþrýstings og tilheyrandi hjarta- og æðasjúkdómi en það mun hafa gert illt verra að hann þjáðist einnig af Alzheimer-sjúkdómnum. Við krufningu fundust engin merki um áverka en skýr merki um að Hackman hafi fengið fleiri en eitt hjartaáfall og hjarta hans var illa farið.
Arakawa lést á undan Hackman, þann 11. febrúar og líklegt er talið að hann hafi ekki gert sér grein fyrir því vegna ástands síns. Talið er líklegt að Hackman hafi látist viku síðar eftir að hafa dottið en erfitt er að komast að nákvæmri niðurstöðu um það.
Þau höfðu því verið látin í nokkurn tíma þegar þau fundust. Fyrst var talið að gaseitrun hafi valdið dauða hjónanna en nú er ljóst að svo var ekki.
Arakawa var seinni eiginkona Hackman en þau voru gift í 34 ár. Hackman skildi við fyrri eiginkonu sína, Faye Maltese, árið 1986 eftir 30 ára hjónaband og tók saman við Arakawa. Hackman og Maltese, sem lést 2017, eignuðust 3 börn.
Arakawa og Hackman eru sögð hafa haldið sig að miklu leyti út af fyrir sig undanfarin ár, sérstaklega eftir að Hackman settist í helgan stein í upphafi þessarar aldar, sem er talið útskýra hversu lengi þau höfðu verið látin þegar þau loks fundust.
