„Örverkfallið er hreinn og klár óþverraskapur því það hefur engin áhrif á samningaviðræðurnar. Einu áhrifin eru að mismuna börnum og flækja daglegt líf vikum saman hjá hópi fólks sem hefur enga aðkomu að kjaraviðræðunum,“ segir Ólafur Hauksson, almennatengill og afi nemanda í Leikskóla Seltjarnarnes.

Þetta kemur fram í grein á Vísir.is, og er það ekki fyrsta greinin sem Ólafur birtir á Vísir.is um kennaraverkfallið en hann hefur gagnrýnt harðlega þá nálgun kennara í baráttunni að efna til verkfalls í fáum skólum. Um þetta segir hann í nýju greininni:

„Það er frekar vandræðalegt fyrir kennarasambandið að einn helsti sérfræðingur landsins í vinnumarkaðsmálum gefur örverkfalli þess falleinkunn.

Í viðtali við Stöð 2 segir Gylfi Dalmann Aðalsteinsson prófessor við HÍ að yfirleitt fari opinberir starfsmenn í verkfall í stærri hópum, sem skapi meiri þunga og pressu á ríki eða sveitarfélög. Nýja sérsniðna verkfallið í örfáum skólum virki ekki þannig, heldur bitni á notendum þjónustunnar, nemendum og foreldrum.

Spurður af fréttamanni Stöðvar 2 hvort honum finnist þessi tegund af verkföllum góð leið til að ná fram kröfum svarar Gylfi mjög afgerandi „Nei.““

Ólafur kallar aðgerðirnar örverkfall og segir það engum árangri hafa skilað. Hann segir jafnframt að verkfallið stríði gegn lögum þar sem það uppfylli ekki 14. grein laga um stéttarfélög og vinnudeilur. Þar segir meðal annars:

„Heimilt er stéttarfélögum að gera verkföll í þeim tilgangi, að vinna að framgangi krafna sinna í vinnudeilum.“

Bendir Ólafur á að verkfall 3% kennara vinni ekki að framgangi krafn þeirra og því uppfylli verkfallið ekki kröfur laganna um að tilgangur verkfalls sé að knýja fram samninga.

„Pressan er engin. Lamaðar samningaviðræður og álit Gylfa Dalmann taka af allan vafa um að lögmæti verkfallsins er ekki fyrir hendi,“ segir Ólafur en grein hans má lesa hér.