Steinunn er þriggja barna móðir. Hún eignaðist tvíburadrengi þegar hún var tvítug en um hálfum áratug síðar hætti hún og barnsfaðir hennar saman. Þegar drengirnir voru átta ára hafði Steinunn kynnst öðrum manni og eignuðust þau dóttur saman. Leiðir þeirra skildu fyrir nokkrum árum og deilir Steinunn forræði með báðum barnsfeðrum sínum. Börnin eru viku í senn hjá henni og viku hjá þeim. Hún segir það ganga vel og að lykillinn sé að sýna auðmýkt og virðingu í samskiptum.
Horfðu á brot úr þættinum hér að neðan og smelltu hér til að horfa á hann í heild sinni, eða hlustaðu á Spotify.
„Fyrst fannst mér þetta mjög erfitt, þegar ég skildi við fyrri barnsföður minn. Þá vorum við búin að vera saman í sex ár […] Mér fannst það erfitt. Ég var að upplifa alls konar tilfinningar, ég fann fyrir ógeðslega mikilli höfnun. Hann eignaðist nýja konu strax og mér fannst þetta bara… tilfinningarnar tóku mig bara einhvern veginn. Mér fannst allt svo ósanngjarnt og erfitt og leiðinlegt og ömurlegt,“ segir Steinunn og bætir við að hún hafi verið í fórnarlambsgír á þessum tíma.
„Svo einhvern veginn tók ég mig saman og sætti mig við aðstæður. Ég man ég fór til sálfræðings á þessum tíma og hún sagði við mig: „Ef að börnin þín fá auka manneskju inn í líf sitt sem elskar þá og sér um þá og er í stjúpforeldrishlutverki fyrir þá, hvað er þá að? Yfir hverju er hægt að kvarta? Barnið þitt á auka manneskju sem elskar það.“ Ég sá þetta þá frá öðru sjónarhorni og það small eitthvað í hausnum á mér. Svona: Aa, ókei þetta snýst ekki um mig, ég er ekki aðalpersónan hérna. Ég þurfti að læra að vera auðmjúk.“
Steinunn segir það ganga vel að deila forræði. „Auðvitað eru oft árekstrar hér og þar, sérstaklega í byrjun. En svo einhvern veginn hefur þetta verið voða smooth, við erum öll góðir vinir. Ég ber mikla virðingu fyrir báðum barnsfeðrum mínum og konu annars þeirra,“ segir hún.
„Ég held að þetta sé bara eitt það mest þroskandi sem ég hef gert, fyrir utan að eignast börnin sjálf, að þurfa að átta mig á að ég er ekki aðalpersónan og þarf að leggja mínar tilfinningar til hliðar og bera virðingu fyrir öðru fólki. Mér fannst þetta ótrúlega lærdómsrík upplifun að ganga í gegnum þetta. Nú hef ég gert það tvisvar og það gengur ótrúlega vel. Þetta er ekki alltaf martröð eins og fólk kannski sér fyrir sér, það er alveg hægt að gera þetta á fallegan og góðan hátt.“
Steinunn ræðir þetta nánar í spilaranum hér að ofan. Smelltu hér til að horfa á hann í heild sinni eða hlustaðu á Spotify.
