Jarðskjálftafræðingurinn Reynir Böðvarsson segir að íslenska þjóðin sé búin að fá nóg af Sjálfstæðisflokknum, enda tími kominn til. Flokkurinn hafi í gegnum árin skreytt sig stolnum fjöðrum verkalýðshreyfingarinnar en í raun ekkert gert nema vinna að hagi ríkustu landsmanna. Þetta kemur fram í grein Reynis sem birtist hjá Vísi í dag.

Reynir segir Sjálfstæðisflokkinn ekkert erindi eiga í íslensku stjórnmál, ekki nema bara til að gæta hagsmuna ríkustu 10% landsmanna. Auk þess standi flokkurinn í vegi fyrir framförum og þær jákvæðu breytingar sem hafa átt sér stað hér á landi, í þágu fólksins, séu alfarið vegna vinstri flokka og verkalýðshreyfinga.

„Með stofnun verkalýðsfélaga tókst að hækka laun, stytta vinnudag og bæta vinnuaðstæður. Með beinum þrýstingi og samningum náði verkalýðshreyfingin fram mikilvægum árangri, svo sem lögum um vinnuvernd, lögum um stéttarfélög og vinnudeilur, og lögum um almannatryggingar. Þetta tryggði betri réttindi fyrir launafólk, eins og veikindarétt, orlof og atvinnuleysistryggingar. Verkalýðshreyfingin átti stóran þátt í að byggja upp samtryggingarkerfið á Íslandi, sem hafði gríðarleg áhrif á velferð launafólks. Þessi kerfi tryggðu réttindi eins og fæðingarorlof, atvinnuleysisbætur og lífeyri. Íslensk verkalýðshreyfing átti einnig hlutdeild í því að bæta húsnæðismál með því að stofna verkamannabústaði og stuðla að stofnun húsnæðissamvinnufélaga. Þetta auðveldaði launafólki að eignast eigið húsnæði. Öllum þessum umbótum barðist Sjálfstæðisflokkurinn gegn og reyndu ásamt félögum atvinnurekenda, sem er í rauninni félagsskapur auðmanna þar sem hver króna gefur atkvæði, á allan hátt að koma í veg fyrir.“

Baráttan fyrir bættum kjörum hafi iðulega mætt mótstöðu Sjálfstæðisflokks og samtökum atvinnurekenda. Reynir vonast til að nú sé þessi tíð liðin enda sé Sjálfstæðisflokkurinn að mælast með fylgi í sögulegu lágmarki í skoðanakönnunum. Kannski séu landsmenn farnir að sjá í gegnum blekkinguna.

„Er almenningur loks að átta sig á hverskonar flokkur þetta er, að sagan sem sögð er á síðum Morgunblaðsins og úr ræðupúltinu í Valhöll er ekki sönn? Er fólk farið að átta sig á að þetta er flokkur auðvaldsins sem berst gegn og hefur alltaf barist gegn réttindum og velferð hins almenna launþega?“

Vonandi sé skeið Sjálfstæðisflokksins liðið. „Þolinmæði fólks er þrotin, fólk er búið að fá nóg, búið að fá nóg af Sjálfstæðisflokknum.“