Stór tíðindi bárust í íslenska fjölmiðlaheiminum í vikunni þegar Þórður Snær Júlíusson, annar af ritstjórum Heimildarinnar, tilkynnti um brotthvarf sitt af miðlinum.
Þórður Snær stofnaði Kjarnann ásamt samstarfsfólki árið 2013 og gegndi þar starfi ritstjóra. Í lok árs 2022 sameinaðist vefmiðillinn svo Stundinni og varð Þórður Snær þá ritstjóri sameiginlegs miðils ásamt Ingibjörgu Dögg Kjartansdóttur, Jón Trausti Reynisson, sambýlismaður Ingibjargar Daggar, varð framkvæmdastjóri hins sameinaða miðils.
Fyrir utanaðkomandi kom brotthvarf Þórðar Snæs eins og þruma úr heiðskíru lofti enda hefur miðillinn heldur betur blásið í herlúðranna undanfarið árið með aukinni tíðni útgáfudaga, fjölgun blaðamanna og stofnun sérstakrar netdeildar.
Davíð Oddsson, ritstjóri Morgunblaðsins, fjallar um brotthvarf Þórðar Snæs í Staksteinum Morgunblaðsins í morgun og veltir hann þar upp ágengum spurningum um hvað gerst hafi bak við tjöldin. Greinilegt er að ritstjóranum leiðist ekki hugsanleg bræðravíg hjá samkeppnisaðilanum enda hefur iðulega andað köldu milli Davíðs og stjórnenda Heimildarinnar sem hafa gagnrýnt hann og rekstur Árvakurs, útgáfufélag Morgunblaðsins, ítrekað í gegnum tíðina.
Byrjar Davíð á því í pistlinum að benda á þrátt fyrir aukinn kraft í útgáfunni hefur árangurinn ekki verið eins og stefnt var af. Útbreiðsla blaðsins er síst að aukast og lesturinn á vefsíðu miðilsins er í sögulegu lágmarki.
Þá hefur Davíð greinilega lagst yfir Facebook-síðu Þórðar Snæs og veltir því fyrir sér af hverju hvorki Ingibjörg Dögg né Jón Trausti hafi fyrrum vopnabróður sínum kveðju eða þakkir fyrir samstarfið. Þá hefur ekki enn birst frétt um það á vef Heimildarinnar að annar ritstjórinn hafi stigið til hliðar.
„Það hlýtur að vera til marks um eitthvað,“ skrifar Davíð og ýjar að átökum bak við tjöldin.
