Þetta hefur Morgunblaðið eftir Sveinbirni Indriðasyni, forstjóra Isavia, í umfjöllun um málið í dag. Rætt hefur verið um öryggi Keflavíkurflugvallar í ljósi jarðhræringanna á Reykjanesi og fyrri umræða um að reisa flugvöll í Hvassahrauni.
Aðspurður hvort það sé raunhæft að byggja annan alþjóðaflugvöll á Suðurlandi, flugvöll sem geti betur dreift umferð erlendra ferðamanna, sagði Sveinbjörn að mikilvægt sé að gera sér grein fyrir því að þetta sé stór fjárfesting fyrir lítið hagkerfi eins og það íslenska.
„Það er óhætt að fullyrða að það gæti kostað 300 til 500 milljarða króna að byggja nýjan alþjóðaflugvöll sem gæti tekið við tengifluginu,“ sagði hann.
Hann sagði að ekkert standi tæknilega í vegi fyrir byggingu nýs alþjóðaflugvallar fyrir beint flug til og frá landinu en stóra spurningin sé hvort rétt sé að nota ríkisfjármagn í slíka framkvæmd. Líklegt megi teljast að sá flugvöllur muni seint og jafnvel aldrei geta staðið undir sér fjárhagslega.
Hægt er að lesa nánar um málið í Morgunblaðinu í dag.
