Ómar R. Valdimarsson, lögmaður og verjandi Alexanders Mána Björnssonar í Bankastræti Club-málinu, fór fram á 13-14 milljónir króna í laun fyrir störf sín en fékk aðeins rúmlega helming þeirrar upphæðar. Morgunblaðið greindi fyrst frá.   Ríkissjóður borgar launin en hefur svo kröfu á skjólstæðing Ómars en sá hlaut þyngsta dóminn í málinu, sex ára fangelsi fyrir tilraun til manndráps.

Eins og aðrir lögmenn í málinu sendi Ómar sundurliðað yfirlit yfir tímafjölda sína og kvaðst hann hafa unnið í 594 klukkustundir að málinu auk viðbótartíma sem voru tilkomnir vegna framlengingar á gæsluvarðhaldi Alexanders Mána. Miðað við reglur ætti tímagjald lögmanna að vera 23.5oo krónur sem hefði þýtt að málsvarnarlaun Ómars  hefðu verið allt að 14 milljónir króna.

Héraðsdómari mat það hins vegar svo að hófleg málsvarnarlaun til handa Ómari væru 7,8 milljónir króna og gaf lítið fyrir tilraunir Ómars til þess að sanna tímafjöldann með því að láta skjólstæðing kvitta fyrir samskipti þeirra í tímaskýrsluna.