Jón Gunnarsson, fyrrverandi dómsmálaráðherra, telur að Svandís Svavarsdóttir hafi gerst brotleg við lög er hún bannaði hvalveiðar fyrr í sumar. Hann segir að ráðherra sem brjóti gegn stjórnarskrá eigi að víkja úr embætti. Vinstri græn vörðu Jón gegn vantrauststillögu á þingi í vor með því skilyrði að hann hyrfi úr ríkisstjórn nú í sumar.
Þetta kemur fram í nýjum hlaðvarpsþætti, Ein Pæling.
Vinstri Græn gerðu kröfu um að Jón Gunnarsson viki úr ríkisstjórn ef þau styddu hann gegn vantrausttillögu sem lögð var fram gegn honum í mars síðastliðnum. Að sögn Jóns sögðust þau með miklum trega vera tilbúin að styðja við bakið á honum en samhliða því hafi honum hafi verið tjáð að Sjálfstæðisflokkurinn myndi þurfa að gera ráðstafanir ef ríkisstjórnarsamstarfið ætti að halda áfram.
Þáttarstjórnandi spurði Jón hvort hann myndi styðja vantrauststillögu gegn Svandísi Svavarsdóttur og hann svaraði:
„Maður verður að meta alltaf forsendur fyrir vantrauststillögu. Ég fékk nú á mig vantrauststillögu í vor og heilmiklar yfirlýsingar um það að ég væri búinn að brjóta lög og á grundvelli þess var borin á mig vantrauststillaga. Og samstarfsflokkarnir, meðal annars Vinstri græn, sem að Svandís er nú í, — þau, með miklum trega, vörðu mig gagnvart þessu vantrausti og sögðu mér að það væri nú ekkert sjálfsagt að þau væru að gera það. Það voru bara skilaboðin sem að ég fékk beint frá þeim. Og mér var sagt það að þau hafi sett það sem skilyrði að ef að ég yrði varinn þessu vantrausti af þeirra hálfu að þá yrði ég að víkja úr ríkisstjórninni í vor.“
Um vantraust gegn Svandísi sagði Jón að í þeim tilfellum er ráðherra gerist sekur um að brjóta gegn stjórnarskrá finnist honum sjálfsagt að sá ráðherra víki úr embætti. Ekki ætti að þurfa vantrauststillögu til þess. Um hvalveiðibann Svandísar sagði Jón að allt benti til þess að hún hafi gerst brotleg og að hann hefði sjálfur aldrei komist upp með slík vinnubrögð í sínu ráðuneyti. Miðað við þau málsgögn sem komið hafa fram segir Jón ekkert benda til annars en að Svandís hafi brotið lög með sinni ákvörðun.
Aðspurður um það hvort hann muni styðja vantrauststillögu gegn Svandísi Svavarsdóttur segist hann ekki ætla að taka ábyrgð á þeirri vegferð sem hún sé á í hvalveiðimálinu, ætli ekki að verða meðsekur.
Jón segir VG hafa sýnt óheilindi í stjórnarsamstarfinu á þessu kjörtímabili og það hafi hljómað í sín eyru eins og öfugmælavísa þegar forsætisráðherra steig fram fyrir skemmstu og sagði flokkinn vera í þessu stjórnarsamstarfi af heilindum.
Hægt er að hlusta á hluta hlaðvarpsins, Ein pæling, hér.
