Verslunarmannafélag Reykjavíkur hefur ákveðið að færa aurana sína frá Íslandsbanka eitthvað annað. Ekki liggur fyrir hvert en bjóða á út viðskiptin. Í hádegisfréttum Ríkisins segir formaðurinn að umfangsmikil lögbrot bankans við sölu á smáræði í sjálfum sér verði að hafa afleiðingar og á þar líklega við að aurar verslunarmanna fari í rentu annars staðar en þar. Refsivöndurinn er aldrei fjarri þegar Verslunarmannafélag Reykjavíkur er annars vegar.

Svarthöfða þykir fara vel á því að félagið beiti refsingum að vild ef formanninum mislíkar. Það hefur líka gefist vel. Félagið beitti sér fyrir því með skuggastjórnunartilburðum að Lífeyrissjóður verslunarmanna sniðgengi útboð á hlutum í Icelandair fyrir um það bil þremur árum og forðaði þannig sjóðnum frá því að hagnast myndarlega á þeim viðskiptum – sem aldrei urðu. Tilefni afskipta formannsins þá var að honum líkaði ekki samningatækni fyrirsvarsmanna Icelandair í kjaradeilu við flugfreyjur.

Reyndar segja sumir að formaðurinn hafi með þessari framgöngu sinni sjálfur framið lögbrot því hann situr ekki í stjórn sjóðsins og hefur enga aðkomu að honum fyrir utan að greiða þangað iðgjöld. Formaðurinn og stjórn hans láta ekki við þetta sitja heldur hvetja nú Lífeyrissjóð verslunarmanna að fara að dæmi félags síns sem sveiflar nú refsivendinum án afláts.

Svarthöfði vonar að Verslunarmannafélag Reykjavíkur taki í vaxandi mæli þátt í refsivörslu hér á landi og jafnvel víðar. Ekki er nú vanþörf á þegar févana eftirlitsstofnanir komast ekki yfir verkefni sín.

Þannig gæti félagið tekið aukinn þátt í verkefnum á fjölbreyttum sviðum eftirlitsiðnaðarins. Mörg dæmi má nefna. Umferðareftirlit, samkeppniseftirlit, áfengiseftirlits og jafnvel eftirlit við veiðiár landsins.