Athafnamaðurinn, Jón Ólafsson, hefur eftir mikla og kostnaðarsama uppbyggingu tryggt vatnsfyrirtæki sínu, Icelandic Water Holdings, í Ölfusi mikla fjármuni með risasamningi við erlenda fjárfesta.

Ólafur Arnarson fjallar um þetta í Náttfarapistli á Hringbraut og bendir á að Morgunblaðið var fyrst með þessa frétt. Telur hann það grátbroslegt hlutskipti Davíðs Oddssonar, hins aldna ritstjóra blaðsins, sem hafi verið yfirlýstur hatursmaður Jóns Ólafssonar þegar hann var og hét sem forsætisráðherra. Hann hafi hvarvetna lagt stein í götu Jóns og sé meðal annars talinn hafa látið undirmenn sína siga skattalögreglunni á hann.

Ólafur rifjar upp að á þeim árum sem Davíð vildi öllu ráða í samfélaginu var Jón Ólafsson í hópi þeirra athafnamanna sem fóru sínar eigin leiðir og létu Davíð Oddsson ekki skipa sér fyrir verkum. Dæmi um það hafi verið svonefndur ORCA-hópur, sem Jón var hluti af. ORCA-hópurinn eignaðist stóra eignarhluti í bönkum þvert gegn vilja forsætisráðherrans ráðríka.

Jón Ólafsson stóð af sér róg og allar tilraunir til að fella hann og stendur nú uppi sem sigurvegari í þessu stóra vatnsverkefni, skrifar Ólafur.

Gamli hatursmaðurinn, Davíð, sé svo fyrstur með gleðifréttina í sínu blaði. Grátbrosleg örlög það.

Náttfara í heild má lesa hér.