Söngvarinn Júlí Heiðar gaf út yfirlýsingu á Instagram í gær vegna lags sem hann gaf út árið 2009, „Blautt dansgólf“.

Júlí Heiðar var flytjandi lagsins en samdi hvorki lagið né textann.

Lagið olli talsverðu fjaðrafoki vegna ögrandi og grófs texta. Tónlistarmyndbandið var einnig mjög umdeilt en það var tekið út af YouTube eftir tæpan sólarhring.

Þá var „Blautt dansgólf“ bannað á mörgum útvarpsstöðvum.

Blöskraði þegar hann hlustaði á lagið

Fjórtán ár eru liðin frá því að lagið kom út og sér söngvarinn mikið eftir útgáfu þess. Hann segist skilja umtalið sem lagið vakti, enda blöskraði honum sjálfum þegar hann hlustaði á lagið um daginn, í fyrsta skipti í mörg ár.

Yfirlýsingu hans má lesa í heild sinni hér að neðan:

„Blautt dansgólf var framhaldsskólagrín sem fór úr böndunum og kom út árið 2009. Enn þann dag í dag eða 14 árum síðar koma komment tengd laginu á efni sem ég gef út eða set á samfélagsmiðla.

Ég skil svo sem umtalið, ég hlustaði á lagið um daginn í fyrsta skipti í mörg ár og blöskraði, enda textinn hreint út sagt ógeðslegur.

Þegar ég var 18 ára fannst mér þetta frekar fyndið og athyglin var spennandi. Í dag hefði ég gert þetta öðruvísi en við hlaupum víst ekki frá fortíðinni.

Ætli ég losni einhvern tíma við þetta?“