Vestri í Lengjudeild karla er búið að fá til sín fyrsta leikmanninn undir stjórn Davíðs Smára Lamude.
Þetta var staðfest í dag en Davíð Smári tók við liðinu eftir síðasta tímabil og vann áður hjá Kórdrengjum.
Vestri greindi frá því að þrír leikmenn væru búnir að framlengja samning sinn við félagið og mætti til leiks einn nýr leikmaður.
Elvar Baldvinsson kom til liðsins eftir dvöl hjá Þór Akureyri en hann var mikilvægur hluti af liði Þórs á síðustu leiktíð.
Tilkynning Vestra:
Um helgina skrifuðu þeir Aurélien Norest, Elmar Atli Garðarsson og Daníel Agnar Ásgeirsson allir undir nýja tveggja ára samninga.
Þá hefur Elvar Baldvinsson gengið til liðs við Vestra en hann skrifaði einnig undir tveggja ára samning.
Elvar sem er Húsvíkingur getur leikið bæði sem miðvörður og vinstri bakvörður. Hann spilaði 21 leik fyrir Þór Akureyri á síðasta tímabili. Við óskum strákunum til hamingju með nýja samninga og bindum miklar vonir við þá á komandi tímabili.
