Íslendingar treysta ekki lengur Katrínu Jakobsdóttur, forsætisráðherra, best af stjórnmálaleiðtogum landsins. Kristrún Frostadóttir, nýkjörin formaður Samfylkingarinnar, er sá leiðtogi sem landsmenn treysta best.

Þetta eru niðurstöður nýrrar könnunar sem Prósent gerði. Fréttablaðið skýrir frá þessu.

Fram kemur að 25,4% treysti Kristrúnu best.

17,5% treysta Katrínu best en í október á síðasta ári treystu 57,6% henni best samkvæmt könnun Maskínu. Það er því óhætt að segja að það traust sem landsmenn bera til hennar hafi hrunið.

Bjarni Benediktsson, formaður Sjálfstæðisflokksins, er í þriðja sæti samkvæmt könnun Prósents en 15,4% landsmanna treysta honum best.

Sigurður Ingi Jóhannsson, formaður Framsóknarflokksins, kemur þar á eftir með 11,3%.

Sigmundur Davíð Gunnlaugsson, formaður Miðflokksins, er í neðsta sæti listans en 4,6% treysta honum best.

Hægt er að lesa nánar um málið í Fréttablaðinu í dag.