Hildur Björnsdóttir og maður hennar, Jón Skaftason, hafa verið mikið milli tannanna á fólki undanfarið. Í byrjun desember tilkynnti Hildur að hún gæfi kost á sér í fyrsta sæti á lista Sjálfstæðismanna í borginni, en hún er í dag sitjandi varaoddviti. Eyþór Arnalds, núverandi oddviti, hafði þá sagst ætla að gefa áfram kost á sér. Ekkert varð þó úr hinum kraftmikla slag sem í stefndi, því Eyþór dró sig til hlés og sagðist vilja verja meira tíma með fjölskyldu sinni, og einbeita sér að þeim viðskiptum sem hann á í hlut. Enginn hefur enn boðið sig fram gegn Hildi, en kosið verður 26. febrúar.
Hildur hefur jafnframt átt í nógu að snúast á kjörtímabilinu á heimavígvellinum því sumarið 2019 keyptu þau hjónin hús í Vesturbæ Reykjavíkur sem var þá ónýtt. Hildur lýsti framkvæmdunum í nýjasta þætti Heimsóknar með Sindra Sindrasyni sem er á dagskrá Stöðvar 2. „Við förum í allsherjar framkvæmdir. Þetta hús þurfti viðhald á öllu sem hugsast gat,“ sagði Hildur.
Af myndunum að dæma er ljóst að þar eru engar ýkjur á ferð.
Húsið er byggt 1962 og er teiknað af Manfreði Vilhjálmssyni. Hildur segist hafa lagt áherslu á að virða arkítektúrinn hans Manfreðs og vildu bera virðingu fyrir hans verki.
Þau hjónaleysið fluttu svo inn í húsið á Þorláksmessu 2019. Svo gerðist það milli jóla og nýárs, að þau Hildur og Jón giftu sig í þessu sama húsi, sem þau höfðu gert að sínu, að viðstöddum þremur börnum Hildar og hundinum Filippus Mountbatten.
