Willum Þór Þórson heilbrigðisráðherra hefur í samráði við Þórólf Guðnason sóttvarnalækni gert breytingu á reglugerð um einangrun. Með reglugerðarbreytingunni er einangrun einstaklinga sem hafa greinst með Covid-19 stytt úr 10 dögum í 7 daga. Læknum á Covid-19 göngudeild Landspítala er þó heimilt að framlengja einangrun einstaklinga telji þeir að það sé nauðsynlegt.
„Við sjáum gríðarlegt álag á heilbrigðisstofnunum vegna mikilla smita í samfélaginu, sérstaklega er álagið mikið á Covid-göngudeild Landspítalans. Við sjáum líka víðtæk áhrif smita á samfélagið allt og því tel ég þetta vera rétt skref. Ég hvet fólk til þess að halda áfram að fara varlega, og sýna starfsfólki Covid-göngudeildar áfram þolinmæði og virðingu. Við erum öll í þessu saman.“ Segir Willum Þór Þórsson heilbrigðisráðherra í tilkynningu frá heilbrigðisráðuneytinu.
Reglugerðarbreytingin tekur nú þegar gildi og getur bæði haft áhrif á lengd einangrunar hjá einstaklingum sem greindust með COVID-19 fyrir gildistöku, sem og eftir gildistöku. Reglugerðin mun birtast síðar í dag á vef Stjórnartíðinda.
