Tedros Adhanom Ghebreyesus, forstjóri WHO, sagði þetta á fréttamannafundi í gær. „Það veldur okkur áhyggjum að fólk gerir lítið úr Ómíkron og telur afbrigðið vera milt. Við ættum að hafa lært að það er hættulegt að vanmeta þessa veiru,“ sagði hann.
Hann sagði jafnframt að þótt Ómíkron geti valdið vægari veikindum en önnur afbrigði veirunnar þá geti fjöldi smita einn og sér lagt heilbrigðiskerfi margra landa á hliðina.
Hann sagði að Ómíkron breiðist nú út á svo miklum hraða að álíka hröð útbreiðsla hafi aldrei áður sést hjá öðrum afbrigðum kórónuveirunnar.
Ómíkron hefur nú greinst í 77 löndum en Ghebreyesus sagði að líklegt megi teljast að afbrigðið hafi nú borist til flest allra landa heims þrátt fyrir að það hafi ekk enn greinst.
Niðurstöður suðurafrískrar rannsóknar, sem voru birtar í gær, benda til að bóluefnið frá Pfizer/BioNTech veiti ekki eins góða vörn gegn Ómíkron og gegn öðrum afbrigðum veirunnar, til dæmis Delta. Það veitir 33% vörn gegn Ómíkron en 80% gegn öðrum afbrigðum. En ljósið í myrkrinu er að bóluefnið virðist veita góða vernd hvað varðar sjúkrahúsinnlagnir og þær eru yfirleitt stuttar ef þörf er á þeim. Rannsóknin hefur ekki enn verið ritrýnd og því þarf að taka henni með ákveðnum fyrirvara.
