Skólastarf verður fellt niður næstu tvo daga í Hlíðaskóla vegna fjölmargra Covid-smita sem hafa blossað upp á síðustu dögum. Í tilkynningu á vef skólans kemur fram að tekin hafi verið ákvörðun í samvinnu við sóttvarnaryfirvöld að fella niður kennslu í 1-10.bekk á morgun, mánudaginn 6. desember og þriðjudaginn 7. desember.
Áður en skólastarf hefst aftur þurfa síðan allir nemendur að gangast undir Covid-próf, helst seinnipart þriðjudags, áður en þeir mæta aftur í skólann. Með þessari aðgerð vonast skólastjórnendur og sóttvarnaryfirvöld til þess að hefta útbreiðslu smita.
Samkvæmt heimildum DV komu upp á annan tug smita í skólanum síðustu daga, þvert á árganga, og því hafi fjölmargir nemendur þegar verið komnir í sóttkví. Þeir nemendur eru hvattir til þess að fara í PCR próf en aðrir nemendur geta látið hraðprófa duga.
