Aðdáendur hinnar klassísku Home Alone myndar geta nú svo sannarlega tekið gleði sína því húsið, sem McCallister fjölskyldan bjó í, er nú til leigu á Airbnb. En það er aðeins hægt að leigja það í eina nótt.

Sky News segir að Airbnb hafi tilkynnt að opnað verði fyrir skráningu þann 7. desember. Húsið er í Chicago. Leigunni verður stillt mjög í hóf en hún verður 25 dollarar fyrir nóttina og geta allt að fjórir gist í húsinu í einu. Leigutakar fá heimilisfangið upplýst þegar þeir ganga frá bókun. Aðeins er um eina nótt að ræða, þann 12. desember.

Á vefsíðu Airbnb  segir að það sé Buzz McCallister sem standi á bak við útleiguna. Margir muna eflaust eftir honum sem eldri bróður Kevin sem gleymdist heima þegar fjölskyldan fór í ferðalag um jólin.

Hinir heppnu gestir fá fullskreytt hús, þeir mega setja upp gildrur, svona eins og gert var í myndinni, raunveruleg tarantúla verður til staðar og þeir fá að horfa á nýjustu myndina í Home Alone flokknum.