Enskir fjölmiðlar fullyrtu í dag að Ralf Rangnick yrði næsti knattspyrnustjóri Manchester United.
Rangnick er yfirmaður knattspyrnumála hjá Lokomotiv Mosvku í Rússlandi og skrifaði undir þriggja ára samning við félagið í júlí síðastliðnum.
Manchester United vill að Rangnick taki við til bráðabirgða og stýri liðinu út tímabilið á meðan að félagið leitar að arftaka Ole Gunnar Solskjær.
Rangnick sagði í viðtali við The Times í fyrra að honum hefði verið boðinn staða bráðabirgðastjóra hjá Chelsea eftir að Frank Lampard var látinn taka poka sinn.
„Ég sagði að ég vildi koma og starfa hjá félaginu en ég get ekki gert það í fjóra mánuði. Ég er ekki bráðabirgðastjóri. Í augum fjölmiðla og leikmanna yrði ég fjóra mánaða stjóri frá fyrsta degi.“
Chelsea réði Thomas Tuchel í stað Rangnick og hann stýrði liðinu til sigurs í Meistaradeildinni á síðustu leiktíð.
