Dómur var kveðinn upp í Héraðsdómi Reykjaness í máli konu sem stefndi fyrrverandi leigjenda sínum. Konan hafði leigt manninum og eiginkonu hans íbúð frá 1. maí 2015. Fjölskyldan bjó þar fram til loka september árið 2020.
Konan er búsett erlendis og var sá háttur hafður á að umboðsmaður hennar átti í samskiptum við leigjendurna. Var gerður tímabundinn leigusamningur til eins árs í senn og gilti hver samningur frá 1. maí til 1. maí næsta árs. Þannig gekk þetta frá 1. maí 2015 en síðasta leigusamninginn sendi konan eiginkonu hins stefnda í gegnum samskiptaforritið Messenger í lok febrúar árið 2020. Samningurinn fól í sér hækkun á húsaleigunni. Hann var undirritaður af leigusalanum en hjónin undirrituðu hann aldrei.
Þau greiddu hins vegar húsaleigu samkvæmt nýja samningnum en þann 1. júní árið 2020 tilkynnti eiginkonan leigusalanum í gegnum Messenger að þau hjónin væru að festa kaup á íbúð og hyggðust flytja úr úr húsnæðinu um haustið. Leigusalinn svaraði því til að hún teldi þau skuldbundin til að borga leigu út 30. apríl árið 2021 því leigusamningurinn væri tímabundinn og því óuppsegjanlegur. Hjónin töldu hins vegar að leigjan væri uppsegjanleg með þriggja mánaða fyrirvara og höguðu sínum athöfnum í samræmi við það. Fluttu þau út úr íbúðinni í lok september árið 2020.
Í byrjun desember það ár fengu hjónin bréf frá leigusalanum þar sem hún krafði þau um vangoldna húsaleigu og bætur vegna tjóns sem hefði orðið á húsnæðinu á meðan þau bjuggu þar. Hjónin höfnuðu þessum kröfum.
Konan stefndi þeim í apríl á þessu ári og krafðist tæplega 1,3 milljóna króna í skaðabætur. Sagðist hún hafa orðið að ráðast í endurbætur á húsnæðinu vegna umgengni þeirra og hefði því haft lægri leigutekjur frá þeim sem fluttu inn í íbúðina á eftir hjónunum, en ella.
Það var niðurstaða dómsins að annars vegar hefðu hjónin ekki verið á óuppsegjanlegum leigusamningi því þau hefðu aldrei undirritað nýja leigusamninginn. Þá taldi dómurinn engin gögn liggja fyrir sem sýndu að hjónin hefðu skilað íbúðinni í verra ástandinu en þau tóku við henni í. Var því öllum kröfum leigusalans hafnað og henni gert að greiða 1 milljón króna í málskostnað.
