Um nokkurt skeið hefur slúður um ástarlíf Áslaugar Örnu Sigurbjörnsdóttur heltekið kaffistofur landsins. Steininn tók úr fyrr í dag þegar fréttasíða fjölmiðlamannsins Eiríks Jónssonar birti grein þar sem slúðursögunni var gefinn byr undir báða vængi og því haldið fram að þessar meintu vendingar í ástarlífi ráðherrans væru að trufla flokkinn í ríkistjórnarviðræðunum og ekki síst í hinni viðkvæmu útdeilingu á ráðherrasætum. Hefur því meðal annars verið fleygt fram að Áslaug Arna muni sitja eftir með sárt ennið í þeirri pólitísku refskák.

Samkvæmt heimildum Orðsins er það fjarri sanni og er líklegra að sú mynd hafi verið máluð af pólitískum andstæðingum Áslaugar Örnu. Þeir sem ákvarðanirnar taka í flokknum gefa einkalífi ráðherrans lítinn gaum.

Ekki liggur þó fyrir hvaða ráðherrastól Áslaug Arna mun gera að sínum í næstu ríkisstjórn. Samkvæmt heimildum Orðsins eru tvær sviðsmyndir í gangi. Hin fyrri er á þá leið að Áslaug Arna muni einfaldlega gegna embætti dómsmálaráðherra áfram enda hefur hún að mati forystu flokksins staðið sig vel á þeim vígstöðvum og komið mörgum þjóðþrifamálum, að minnsta kosti að mati Sjálfstæðismanna, í gegn.

Hin sviðsmyndin er sú að Áslaug Arna muni taka við lyklavöldum í atvinnu- og nýsköpunarráðuneytinu af vopnasystur sinni, Þórdísi Kolbrúnu Reykfjörð Gylfadóttur. Þórdís Kolbrún myndi hins vegar taka við embætti sjávarútvegsráðherra af Kristjáni Þór Júlíussyni. Verði þessi sviðsmynd að veruleika myndi dómsmálaráðuneytið koma í hlut Vinstri grænna.

Að öllum líkindum er seinni sviðsmyndin orðin líklegri en staðan breytist þó ört.