„Ég biðla bara til þjóðarinnar, ef einhver veit eitthvað. Ég hef án djóks ekki hugmynd,“ segir Aron Pálmarsson handboltamaður en hann varð fyrir líkamsárás í miðborg Reykjavíkur undir lok síðasta árs. Ekki er vitað hver árásarmaðurinn og segist Aron gjarnan vilja setjast niður með honum og spyrja hann út í ástæðuna fyrir árásinni.

„Það var bara einhver algjör snillingur sem ákvað að kýla mig í andlitið,“ segir Aron Pálmarsson í sjónvarpsþættinum Atvinnumennirnir okkar á Stöð 2 „Ég var nýkominn heim og ákvað að kíkja aðeins út á laugardegi. Kvöldið endaði bara upp á slysó með skurð og heilahristing. Ég gat síðan ekki spilað á HM útaf þessu.“

Hann segist ekki vita af hverju hann var sleginn niður. „Ég veit ekkert hver kýldi mig og ég veit ekki af hverju. Ég væri í raun mest til í að liggja bara með gæjanum í svona baði eins og við erum í núna og spyrja: „Hey dude, af hverju?“

„Ég fór á skemmtstaðina sem ég var búinn að vera á um kvöldið og þeir sögðu að það hefði ekki verið neitt vesen á mér,“ segir Aron jafnframt og bætir við að hann hafi engu að síður lagt fram kæru. Það er náttúrulega erfitt að kæra ef það er ekkert andlit á bak við það.“

Þá segir hann að þetta sé í fyrsta sinn sem hann verði fyrir árás af þessu tagi. „Þetta er eiginlega í fyrsta skipti sem ég hef verið laminn.“