Það er óhætt að segja að Xi Jinping, forseti Kína, hafi heljartök á kommúnistaflokknum og ráði lögum og lofum innan flokksins og í Kína. Á laugardaginn sendi ríkisfréttastofan Xinhua út langa lofgjörð um forsetann og er tímasetningin engin tilviljun því fram undan er mikilvægur fundur hjá kommúnistaflokknum þar sem reiknað er með að völd Xi verði staðfest enn frekar.

Tilgangurinn með lofgjörðinni virðist vera að styrkja persónudýrkun á honum en það er aðferð sem kommúnistaflokkurinn hefur áður notað og einkenndi valdatíma Maó. „Xi er maður ákvarðanatöku og aðgerða, maður djúpra hugsana og tilfinninga, maður sem þorir að endurnýja hinn pólitíska arf og maður framúrskarandi hugsjóna sem hann vinnur ötullega að,“ segir í lofgjörðinni sem er rúmlega 5.000 orð og ber yfirskriftina „Xi Jinping, maðurinn sem leiðir kínverska kommúnistaflokkinn á nýrri leið.“

Tímasetningin er engin tilviljun því miðstjórn flokksins fundar næstu fjóra daga og er ekki reiknað með öðru en að fulltrúarnir í henni, 300 til 400 talsins, greiði leið Xi að setu á forsetastóli næstu fimm árin en yfirstandandi tímabil hans í embættinu rennur út haustið 2022. Áður hafði Xi séð til þess að tímamörk á embættistíma forseta voru afnumin.

Fundur miðstjórnarinnar fer fram bak við luktar dyr en væntanleg ákvörðun hans um að tryggja Xi áframhaldandi setu í forsetaembættinu mun styrkja stöðu hans, sem valdamesta leiðtoga Kína frá dögum Maó, enn frekar.

Xinhua segir í lofgjörð sinni að á fundi miðstjórnarinnar verði rætt um mikilvægasta árangur flokksins á þeim 100 árum sem hann hefur verið til. Í greininni er einnig sagt frá tíma Xi í þorpi einu í Shaanzi þar sem hann er sagður hafa staðið fyrir vökvun á ræktarlandi og í frítíma sínum hafi hann lesið rit Karl Marx. Hann er lofsamaður fyrir að hafa endurnýjað flokkinn. Það þarf ekki að koma á óvart að ekki er minnst á mistök hans og þögn hans um COVID-19, sem kom fyrst fram í Kína, en honum er hrósað fyrir „manneskjulega heimspeki“ og hlutverk hennar í að bjarga mannslífum.