Konráð S. Guðjónsson mun láta af störfum sem aðstoðarframkvæmdastjóri Viðskiptaráðs snemma á næsta ári. Þetta kemur fram í stuttri tilkynningu Konráðs á Facebook. Hann hóf störf hjá Viðskiptaráði sem hagfræðingur árið 2017 og segir hann í tilkynningunni að brátt séu fjögur lærdómsrík ár að baki.

Konráð lætur ekki uppi hvað hann hyggst taka sér fyrir hendur og gefur í skyn að það liggi ekki fyrir:

„Eftir fjögur ótrúlega lífleg og lærdómsrík ár verður komið að leiðarlokum hjá Viðskiptaráði snemma á næsta ári. Þakklátur mörgu en fyrst og fremst frábæru núverandi og fyrrverandi samstarfsfólki. Segir maður ekki núna að það séu spennandi tímar framundan? Hvað svo sem kann að vera framundan.“