Stjarnan reynir að sannfæra Heimi Hallgrímsson um að koma til félagsins. Heimir er án starfs en þetta fullyrðir Hjörvar Hafliðason í Dr. Football.
Hjörvar ræddi málið í þætti dagsins en Heimir hafði verið orðaður við Val á dögunum en ekkert var til í slíku. Heimir lét af störfum hjá Al-Arabi í Katar.
„Ég var að tala við einn góðan Stjörnumann. Ég var að segja honum að Valur væri að tala við Heimi, ég hafði ekkert fyrir mér en var að testa vatnið. Ég sá að honum brá mjög mikið,“ sagði Hjörvar í þætti dagsins.
Þorvaldur Örlygsson lét af störfum eftir tímabilið og hefur tekið til starfa á skrifstofu félagsins.
Hjörvar segist hafa setið í Garðabæ alla helgina og getað fengið það staðfest að Stjarnan væri að reyna að sannfæra Heimi um að taka til starfa.
„Ég heyrði greinilega að eitthvað væri í gangi og sat og vann í Pizzunni Garðabæ alla helgina. Stjörnumenn eru að reyna að fá Heimir Hallgrímsson, ég er að segja ykkur það.“
Ágúst Gylfason og Jón Þór Hauksson eru einnig orðaðir við starfið. Ljóst er að Heimir myndi vekja mikla athygli með endurkomu í Pepsi Max-deildina. Hann var síðast þjálfari í deildinni árið 2011 en þá stýrði hann ÍBV.