Carrie Sloan, sem býr í Edinborg í Skotlandi, var að fara að byrja í nýrri vinnu og ákvað því að skella sér í Primark og kaupa sér nýjan hvítan bol fyrir vinnuna. Carrie keypti bolinn en þegar heim var komið sá hún að bolurinn var merktur með nafni manns.

Þetta kom henni á óvart en hún kippti sér þó ekki upp við það. „Ég hugsaði ekki mikið um það, ég hugsaði bara að einhver hefði skilað bolnum í Primark og ég var óheppin að kaupa hann,“ segir Carrie en svo ákváðu vinir hennar að kanna málið nánar.

„Vinir mínir voru hjá mér um daginn og voru að fara í gegnum poka af fötum sem ég ætlaði að losa mig við. Þau fundu þennan hvíta bol og þá mundi ég að ég hafði ekki sagt neinum frá þessu. Þar sem þau eru miklu klárari en ég þá ákváðu þau að gúggla nafnið á bolnum.“

Thomas Hay stóð á miðanum auk staðsetningarinnar Fraserburgh, Brucklay. Þegar þau slógu textann inn á veraldarvefnum komust þau að því að Thomas Hay lést í mars árið 2020 á Brucklay deildinni á Fraserburgh spítalanum. Þá komust þau einnig að því að Thomas var 85 ára gamall.

Carrie vill nú að Primark rannsaki hvers vegna bolur í eigu látins manns endaði í versluninni þeirra. Carrie deildi myndbandi á samfélagsmiðlinum TikTok þar sem hún sagði frá þessu og voru fjölmargir netverjar sem veltu því einnig fyrir sér hvernig bolurinn endaði í versluninni.

„Kannski var bolurinn keyptur og merktur honum en hann dó áður en hann náði að nota hann svo þau skiluðu honum,“ segir til að mynda einn netverji.