„Þetta er ljótasti leikur sem ég hef séð í garð stjórnmálamanns sem er hættur á þingi og hefur lokið sínum ferli,“ segir Guðni Ágústsson, fyrrverandi formaður Framsóknarflokksins, í viðtali við Vísir.is.

Heiftúðug grein sem Tómas Ellert Tómasson, kosningastjóri og frambjóðandi Miðflokksins, birti í gær vakti mikla athygli og má fullyrða að margir hrukku við. Þar sakaði hann Guðna um að vera helsta skítadreifara Framsóknarflokksins og hafa ásamt Lilju Alfreðsdóttur og Ásmundi Einari Daðasyni breitt út lygar og komið af stað rógsherferð á hendur Sigmundi Davíð Gunnlaugssyni, formanni flokksins. Hinir meintu „skítadreifarar“ setji sig í samband við áhrifafólk innan Miðflokksins og lofi þeim „velvild“ ef þau styðji Framsóknarflokksinn.

Sjá einnig: Tómas Ellert hellir sér yfir Guðna Ágústsson

Guðni segir ásakanirnar fráleitar: „Að ég væri skítadreifari að hringja í Miðflokksmenn og rægjandi Sigmund Davíð, en ég er guðfaðir hans í pólitík. Studdi hann heilt og hef aldrei látið mér detta í hug, hvorki á mínum ferli, né í stuðningi við flokkinn að ráðast á menn persónulega,“ segir hann í samtali við Vísi.

Guðni segir ennfremur: „Ég á vini í öllum stjórnmálaflokkum og margir af mínum gömlu góðu flokksmönnum gengu til liðs við Miðflokkinn. Margir eru þar enn og ég ber virðingu fyrir þeim.“